Sociedá

Una esposición muestra la situación de los neños peruanos obligaos a trabayar

Una de les fotos de la esposición.

L’Asociación Global Humanitaria presenta la esposición fotográfica Perú: Historias de Trabajo Infantil, nel marcu de la campaña contra’l trabayu infantil. Va poder vese nel centru comercial Los Prados d’Uviéu (na planta cines) hasta’l 31 de marzu.

Alredor de 30 imáxenes integren esta esposición, onde les semeyes de Juan Díaz dexen conocer les circunstancies dures de los neños y neñes que viven del reciclaxe de basura nel vertederu de Valle Sagrado (Lima), de los neños cuidadores de nichos y de los menores que trabayen na pesca o na minería del lladriyu, nel altiplanu de Perú.

La probitú, la falta d’accesu a la educación y les desigualdaes estructurales son dellos de los factores qu’espliquen por qué un mínimu de 218 millones de menores d’edá, según estimaciones de la OIT, vense obligaos a trabayar en tol mundu. Los proyectos que tien Global Humanitaria en Perú tán orientaos a afalar l’asistencia de los menores a la escuela, partiendo de la premisa de que si’l neñu se mantién dientro del sistema escolar, va poder tener mayores posibilidaes cuando sía adultu.