Sociedá
Delles instituciones y asociaciones asturianes publiquen la «Guía de derechos y deberes de las mujeres inmigrantes»
Portada del llibru.
Instituciones y asociaciones del país iguaron y punxeron na cai estos díes una Guía de derechos y deberes de las mujeres inmirantes; concretamente, foron l’Institutu Asturianu de la Muyer del Gobiernu Asturianu, la Fundación Municipal de Servicios Sociales del Conceyu de Xixón, la Federación de Muyeres Progresistes d’Asturies y l’Asociación de Muyeres Progresistes Sara Suárez Solís.
Al traviés de les sos páxines, dixebraes en nueve capítulos, dase una visión xeneral sobre tolos derechos y deberes que se recueyen nel ordenamientu xurídicu español acerca d’esti tema. Nellos trátense asuntos como los contratos de trabayu, los convenios colectivos, cómo consiguir un permisu de trabayu y de residencia, cómo reclamar derechos, qué ayudes hai y cómo llograles, etc.
La Conseyera de Presidencia, Xusticia y Igualdá, María José Ramos, desplica nel prólogu qué oxetivu tien esta publicación: «La guía que tien nes sos manes quier ser una ferramienta útil pa toes aquelles muyeres que lleguen a la nuestra tierra en busca d’un futuru meyor, un instrumentu pa proporciona-yos información y avera-yos los recursos públicos, tou un exemplu de bones práctiques que, espero, contribuya al exerciciu de los derechos de ciudadanía de les muyeres estranxeres qu’escoyeron Asturies como destín de les sos vides».
