Música

Desakato ultima’l so discu nuevu

Miseria, sangre y plomo ye’l nome del próximu trabayu discográficu de Desakato. La formación punk-rock de Llanera ta a puntu de publicar el so segundu discu d’estudiu, un álbum onde s’endurez el soníu, pero ensin perder l’estilu propiu de la banda. Finales de marzu ye la fecha na que’l cedé formáu por diez cantares nuevos salga a la cai.

Desakato ye una formación creada en Llanera nel 2003. Depués de l’autoedición de dos maquetes, nel 2007 estrenáronse col discu debú Con el viento de cara. Lletres comprometíes socialmente y punk-rock contundente con un sabor personal nos arreglos y na instrumentación ye la marca característica de Desakato.

Grabáu ente los estudios Dinamita de Llugones y La Nave de Llanera y producíu, mezcláu y masterizáu por Pablo Viña nos Parisana 33 de Cangues d’Onís, Miseria, sangre y plomo ye la evolución de Desakato hacia un soníu más duru. Sicasí, nun se pierde la esencia musical de la banda, amás de les collaboraciones de gaita y sección de vientos que yá aparecieren nel discu anterior. L’asturianu tamién tien presencia, con dellos temes cantaos nesa llingua.