Música

Doctor Explosion edita un discu cenciellu

Carátula del discu The Chesterfield Childish Club.

La banda xixonesa Doctor Explosión vien de publicar un EP nuevu en formatu 7”: titúlase The Chesterfield Childish Club y edítalu’l sellu alemán SoundFlat. Sigue na llinia del so últimu trabayu, con un soníu crudu y directu. Tien una cara A d’estilu garaxe rockanroll frenéticu, qu’empieza col so himnu «The Chesterfield Childish Club», esbilláu del discu Chupa aquí y que da títulu a esti EP, y sigue con una versión del clásicu «Beautiful Delilah».

La cara B ye toa una sorpresa, onde dan el contrapuntu cola so faceta más pop. Principia con una composición propia, «Today», col soníu clásicu lo-fi característicu del so últimu discu. Ciarra la cara la versión del «I Wont Be There», de The Tongues of Truth, a la que Doctor Explosion supieron da-y el so propiu toque orixinal incorporando l’harmonica folk-blues y un bon xuegu d’harmoníes a tres voces. La grabación de les bases d’estes dos canciones de la cara B pertenez a les sesiones del Chupa aquí nel 2006, pero les voces, harmóniques y otros arreglos de guitarres y percusión, aparte de les mezcles, fixéronse en setiembre del 2009.

Otramiente, Doctor Explosion nun va tardar muncho en tener un LP nuevu na cai, porque actualmente alcuéntrense trabayando nel estudiu colos temes que van formar parte d’él.