Música

La cantante Joan Baez actúa en Xixón

Joan Baez.

El domingu 7 de marzu, a les 20:30 hores, nel Teatru Xovellanos de Xixón, una cantante mítica como la norteamericana Joan Baez va dar un conciertu. Esta artista ye l’arquetipu de cantante folk tan enraigonáu nes conciencies colectives. De bien moza, en 1959, presentóse nel Festival Folk de Newport, y dende aquella primer actuación siempre mostró una sensibilidá mui distinta a la que tienen los demás artistes.

Ente les canciones que formaron parte de los sos primeros álbunes alcuéntrense munches de les que se convertiríen nos sos grandes clásicos, na so voz y tamién na d’otros cantantes, como «House of the Rising Sun» (un tema popularizáu tamién por The Animals), «Babe I'm Gonna Leave You» (Led Zeppelin) y «Long Black Veil» (The Band). Dende que nesos primeros discos dio a conocer canciones compuestes por Bob Dylan y dalgunos otros grandes nomes, Joan Baez siempre tuvo dispuesta a esplorar territorios musicales nuevos, escoyendo canciones que reconocieren la condición humana.

A lo llargo de cinco décades como cantante, activista y embaxadora de munches causes pacifistes y ecoloxistes, siempre caltuvo’l so compromisu col espíritu de la so voz. Nel 2007 llogró’l reconocimientu de la National Academy of Recording Arts and Sciences col premiu a toa una vida. El so últimu discu, Day after tomorrow, publicose nel 2008.

Nesti conciertu va tar acompañada por John Doyle (guitarra y voces), Dirk Powell (violín, banjo, acordión y mandolina) y Todd Phillips (baxu).