Arte

Siguen los talleres del Proyecto Eye (Enfoque y Espacio)

El domingu 7 de marzu va desenvolvese un taller más de los englobaos nel ciclu Proyecto EYE (Enfoque y Espacio), centraos nes costumes, tradiciones y aspectos culturales de dellos países.

Llaboral Ciudá de la Cultura y el Xardín Botánicu Atlánticu de Xixón entamen la tercer edición d’esti ciclu, dirixíu a neños y rapazos d’ente 8 a 16 años. Al traviés d’ellos va conocese dende la cocina italiana y xaponesa hasta’l folclor alemán, amás de la capoeira o la danza portuguesa. Tienen una duración de tres hores (de 10:30 a 13:30) y desarróllense nes instalaciones de la Llaboral y del Xardín Botánicu.

El domingu que vien, los participantes van averase a la cultura clásica en llingua griega con Las tres Grecias, un taller qu’axunta mitoloxía, lliteratura, astronomía, botánica y arte nun viaxe al mundu antiguu.

Los siguientes talleres previstos son: Alemania de fiesta en fiesta (11 d’abril), ¡Vamos facer sushis! (9 de mayu) y Bailando… me paso el día bailando (6 de xunu).

Nun son necesarios conocimientos previos de los idiomes pa participar nes actividaes. La tarifa ye de 8 euros por taller o 20 euros por inscribise en tres sesiones (les places son limitaes). Pa más información tán los teléfonos 902 306 600 (Llaboral) y 985 185 130 (Xardín Botánicu).