Cultura tradicional

El Conceyu de Colunga convoca un concursu de cartelos

El Conceyu de Colunga acaba de publicar les bases del concursu del cartelu anunciador de los XV Alcuentros cola Cultura Tradicional d’Asturies.

Nél pueden participar toles persones que quieran, individualmente o n’equipu; cada concursante pue presentar como máximu tres trabayos. El tema ye llibre, anque tien qu’obedecer a motivos rellacionaos col eventu: trátase d’un programa d’actividaes de temática tradicional asturiana al traviés de dellos medios d’espresión artístico-cultural (teatru costumista, música tradicional, tonada, charles divulgatives de carácter etnográficu, históricu, social, presentaciones lliteraries, cursos, talleres, esposiciones…). Los trabayos han ser orixinales y inéditos, de concepción y técnica llibres, siempre que sía posible la so reproducción mecánica; los cartelos pueden presentase nun formatu tanto vertical como horizontal y con midíes de 50 cm por 70 cm.

Nes obres tien que constar la lleenda (n’asturianu y castellanu): XV Alcuentros cola Cultura Tradicional d’Asturies, Conceyu Colunga, del 14 al 25 de xunetu de 2010/VV Encuentros con la Cultura Tradicional de Asturias, Concejo de Colunga, del 14 al 25 de julio de 2010.

Establezse un premiu únicu de 200 euros pal cartelu ganador. Los orixinales han unviase a la Casa la Cultura de Colunga, Avenida de la Reconquista, númberu 23, de Colunga (CP 33320), enantes del día 14 d’abril de 2010 (inclusive). El fallu del xuráu va facese ente’l 19 y el 24 d’abril y va ser comunicáu directamente al autor o autora de la obra ganadora.