Música

Pauline en la Playa edita’l so discu nuevu

Pauline en la Playa.

Esta selmana poníase a la venta Física del equipaje, el quintu trabayu discográficu del dúu xixonés Pauline en la Playa. Once años de trayectoria d’estes hermanes xixoneses nótense nesti discu que publica’l sellu Siesta; nos diez cantares que formen el trabayu hai espaciu pal so pop característicu, pero tamién pal jazz, vals o new-folk. Destaquen, amás, les collaboraciones musicales, ente les que s’alcuentra la de la formación folk asturiana La Bandina.

El caleyar musical de Pauline en la Playa principió en 1999 col minicedé Nada como el hogar, discu debú col qu’algamaron el reconocimientu unánime de crítica y públicu, asitiando a estes hermanes como ún de los referentes del pop independiente estatal. Tormenta de ranas, Termitas y otras cosas y Silabario son los otros trabayos editaos pol dúu, discos nos que’l pop ye puntu de partida, xugando con estilos musicales variaos.

En Física del equipaje Pauline en la Playa afita la fórmula de fusión y sigue esplorando sonoridaes nueves. L’acordión diatónica, la sección de vientos, l’ukelele o la gaita rabil ponen más son a un trabayu que s’escucha como una maleta enllena d’histories. Diez paraes en forma de canción pa un viaxe musical que, davezu, muévese por estilos como’l vals, pop, jazz o new-folk.

Esti trabayu nuevu aparez en formatu cedé y vinilu. Contó cola participación de dellos músicos y la collaboración nun tema en llingua asturiana de La Bandina. La grabación y mezcla fíxose nos estudios Circo Perrotti de Xixón cola producción de Daniel Fletcher; el norteamericanu Jim DeMain fixo la masterización nos  Estaos Uníos.