Cultura tradicional

Carlos Suari acaba l’Atles de los Bolos Asturianos

L’Atles de los Bolos Asturianos (ABA) presentábase nel branu pasáu como una investigación que quería afondar nos raigaños culturales de los xuegos de bolos n’Asturies, aprovechando pa facer un rastrexu del repertoriu, reformulando variables y clasificaciones de dalgunes investigaciones previes. L’encargáu d'esta xera foi Carlos Suari, que contó cola collaboración de munches persones, alministraciones y entidaes socioculturales qu’aportaron información o informantes d’altísimu valor pa esti trabayu, llegando inclusive a la rede social Facebook.

El trabayu, con una ayuda del Principáu d’Asturies, tuvo una duración de más de 10 meses y analizó cerca de 800 paquetes de datos ente la bibliografía y les visites, les entrevistes y les encuestes directes y diferíes feches nos setenta y ocho conceyos asturianos, l’oriente gallegu, el norte de Llión y bona parte de Cantabria. Amás, buscáronse referencies del restu del marcu européu que permitieron facer delles interpretaciones de conxuntu.

Agora, y con too ello, prepárase un material divulgativo pal que ta buscándose forma y fontes de financiación en collaboración con Suburbia Ediciones. El llibru va tener tres partes: un ensayu, una guía de tolos xuegos de bolos asturianos y un miniatles coles considerances etnoxeográfiques más interesantes.

Carlos Suari Rodrigue (Avilés, 1983) ye profesor, llicenciáu en Ciencies de l’Actividá Física y del Deporte con estudios n’Antropoloxía Social y Cultural, etnógrafu especializáu nel patrimoniu lúdico-motor y la so aplicación a la enseñanza, y responsable del programa Acuto de la RPA.