Arte
La esposición «Jóvenes valores del arte asturiano» presenta la pintura más nueva fecha n’Asturies
04-03-2010La galería Van Dyck de Xixón inaugura’l vienres 5 de marzu la
esposición colectiva Jóvenes valores del arte asturiano, na
que los responsables de la sala d’arte quixeron apostar por una xeneración de
creadores nacíos o vinculaos a Asturies. Nella axúntase una colección de cerca
de mediu centenar d’obres pictóriques feches por cinco artistes: Virginia
López, Nuria Formentí, Edgar Plans, Carlos Tárdez y María Vallina. La mayor
parte de los cuadros, caracterizaos por una pintura fresca que combina
figuración, abstracción y otros estilos en técniques variaes, yá tuvieron
espuestos nesta sala de la cai Menéndez Valdés de Xixón, onde van permanecer
hasta’l 3 d’abril.
Virginia López (Xixón, 1975), que l’añu pasáu participó na muestra
Jóvenes valores del arte contemporáneo con trabayos ente los
que destacaba la presencia del cuerpu femenín, vuelve con delles composiciones
de cera incorporaes a les sos técniques mistes.
La propuesta de Nuria Formentí (Xixón, 1971), a mediu camín ente’l
realismu y el pop art, recueye acrílicos sobre la xente del
Caribe, ente los que figuren trabayos inspiraos nel terremotu recíen
d’Haití.
Edgar Plans (Madrid, 1977), llicenciáu n’Historia del Arte pola
Universidá d’Uviéu, ye l’autor de la cubierta del catálogu, onde vuelve a
reflexar la innovación del so graffiti con motivos infantiles.
Carlos Tárdez (Madrid, 1976), empieza a abrise pasu en museos como’l
Nacional d’Escultura Contemporánea de Portugal. Na muestra inclúi obres basaes
na naturaleza.
P’acabar, María Vallina (Llangréu, 1978), qu’anguaño disfruta d’una beca
na Academia Española de Belles Artes de Roma, destaca pol coloríu intensu de
los sos cuadros.
