Música

Los Premios AMAS celebren la so Gala d’Entrega

Premios AMAS 2008.

La Gala d’Entrega de los Premios AMAS 2010 va facese’l vienres 5 de marzu nel Teatru Filarmónica d’Uviéu (20:00 hores), día nel que van dase a conocer los nomes de los gallardonaos.

L’Asociación Cultural Canal Asturias, editora del Anuario de la Música en Asturias, convocó’l quintu añu siguíu los Premios AMAS. Creaos col oxetivu de reconocer el llabor de la escena musical asturiana nel so conxuntu, llogren axuntar nes sos gales d’entrega a bona parte d’ella, ensin distinción d’estilos o llingües. Estos gallardones premien, en venti categoríes, tanto los trabayos en grupu como individuales.

Les categoríes establecíes nestos Premios AMAS 2010 son: Portada y diseñu, Videoclip, Revelación, Canción otres escenes, Canción folk/tradicional, Canción rock, Discu otres escenes, Discu folk/tradicional, Discu rock, Banda sonora de curtiumetraxe asturianu, Voz, Guitarra, Baxu, Batería, Tecles, Otros instrumentos, Gaita, Producción, Lletres y Directo. Tolos nominaos nelles pueden consultase na páxina web www.premiosamas.com.

Amás de toes eses categoríes, van entregase tamién los AMAS Honoríficos, que recayeron nel conocíu productor yá desaparecíu Pedro Bastarrica y nel guitarrista y alma del grupu Ilegales, Jorge Martínez.