Sociedá

La esposición «Muyeres x Muyeres» muestra una visión femenina al traviés de la fotografía

Hasta’l 28 de marzu va tar abierta nel CMI El Llano de Xixón la esposición titulada Muyeres x Muyeres. El Foru de Muyeres d’El Llano vien faciendo un llabor ampliu y interesante a favor de la igualdá de la muyer y afalando a la so participación en tolos ámbitos de la sociedá. Como contribución a la celebración del Día Internacional de la Muyer entamó esta esposición fotográfica con esi títulu por delles razones; primero, porque foron les integrantes del Foru de Muyeres les que, a pesar de nun tener una formación especializada nesta materia, decidieron garrar la cámara pa mostrar un conxuntu d’imáxenes con una exa temática mui específica: la muyer en delles estayes del trabayu, d’ociu, del deporte etc., y ufiertar un reflexu cenciellu de la so incorporación y integración n’aspectos distintos del desarrollu personal, laboral y social. En definitiva, naquellos ámbitos que se percibíen hasta hai bien poco como específicamente masculinos (bombera, minera, apareyadora, soldadora, conductora d’autobús, veterinaria, etc.). Trátase, en fin, d’ufiertar una esposición fotográfica que, anque ensin pretensiones artístiques, tien ensin dulda un valor añadíu de testimoniu y compromisu.