Música

L’Academia de la Música entrega’l Premiu a la Meyor Cancion n’Asturianu

El xueves 4 de marzu, nel Teatru Calderón de Madrid, l’Academia de les Artes y les Ciencies de la Música va facer entrega del gallardón a la Meyor Canción n’Asturianu. L’actu inclúise dientro de la gala de los Premios de la Música, onde van entregase los demás gallardones nes otres categoríes.

L’Academia de les Artes y les Ciencies de la Música daba a conocer en rueda de prensa, hai unes selmanes, los ganadores de toles categoríes (28 en total) de la XIV edición de los Premios de la Música. Ente ellos, los de «Meyor Canción n’Asturianu», apartáu establecíu hai unos años (igual que pal gallegu, vascu y catalán). El tema ganador d’esta convocatoria foi «Cantar de la redención», del grupu Dixebra, que ta incluíu nel so últimu trabayu discográficu, Amor incendiariu (Discos L’Aguañaz 2009), una pieza d’estilu reggae con lletra del escritor xixonés Francisco Álvarez y música de Sergio Rodríguez. Destaquen nél, musicalmente, los arreglos de la sección de vientu y los coros femeninos; temáticamente, fala de les penuries que los inmigrantes pasen intentando llegar a Europa. Los demás finalistes yeren Mapi Quintana, col tema «11 de mayu» (del discu El sonar de les semeyes); Spanta la Xente, con «El canciu’l mineru» (del discu Fíos d’esta tierra); y Músicos pola Oficialidá, con «Ye lo que nos pasa» (del discu Ye lo que nos pasa).

Desque se creó esti premiu, los ganadores foron Pepín Robles con «Nunca máis» (2004), Chus Pedro con «Agora sal a bailar» (2005), Los Berrones con «Fai deporte» (2006), Rossaleda Jazz Quartet con «Na fonte» (2007), Tejedor con «Seique non» (2008) y Esther Fonseca con «Negra» (2009).