Música

Duerna lleva la so música a Cualloto

Duerna.

El grupu Duerna va dar una actuación el xueves 4 de marzu, a les 21:00 hores, dientro del programa estable de conciertos que la sidrería Tierra Astur de Cualloto fai a lo llargo de tol añu. Esta iniciativa quier dar a conocer la música tradicional y folk asturianu d’una manera distinta a lo que ye vezu, y pa eso axunta gastronomía, cultura y música nun mesmu entornu, cola posibilidá de disfrutar d’estos tres elementos al mesmu tiempu. Pel so escenariu pasaron y pasen munches de les propuestes nueves en cuantes a los soníos más tradicionales que se tán faciendo anguaño n’Asturies, ensin escaecer aquellos otros que reellaboren esa tradición, como pueden ser los grupos de folk.

Duerna ye un grupu que nació nel valle’l Nalón, nel branu de 2008, col aquel de pasalo bien y tresmitir esti espiritu a la xente qu’acudiera a los sos conciertos. Nun son una formación folk propiamente dicha; tampoco una bandina tradicional; el so estilu alcuéntrase nel mediu de les dos propuestes. La so instrumentacion ta compuesta por gaita, tambor, bombu, guitarra y harmónica. El repertoriu qu’interpreten, na so mayoría, convida al baille, con ritmos como muñeires, xotes, saltones, sones, rumbes, pasodobles, tangos o habaneres. Tamién tienen dalgún tema de composición propia, siempre con lletres n’asturianu. Los integrantes de Duerna son Andrés Martínez, Estefanía Moro, Pedrín y Pablo Carrera, toos ellos del valle’l Nalón. Ente les sos influencies atópense La Bandina, Tuenda, DRD, Patriband Folk Orl.lestra, La Bandina'l Tombo, La Curuxa, El cocu la mazana, Nuberu o La Musgaña.

Otramiente, Duerna sacaba hai unos meses la so primer maqueta, titulada Dende’l chigre. Grabada a lo llargo de la seronda pasada nos estudios Luna Music de Llugo (Llanera), ta compuesta de cuatro temes, instrumentales y cantaos, nos que podemos sentir tanto composiciones propies como igües de pieces tradicionales. Nel Myspace del grupu (www.myspace.com/duerna) pue vese un videu promocional y oyer dalgún tema.