Música

El blues d’Eddie C. Campbell llega a Uviéu

Eddie C. Campbell.

El miércoles 3 de marzu, a les 20:00 hores, nel Teatru Filarmónica d’Uviéu, va facese una sesión de blues a cargu d’Eddie C. Campbell, dientro del ciclu de Cajastur Música del sieglu XX. La entrada ye llibre y gratuíta hasta completar l’aforu.

Eddie C. Campbell ye ún de los guitarristes más influyentes de la ciudá de Chicago, y pioneru del llamáu Chicago West Side Blues. Nacíu nel estáu de Mississipi en 1939, esti cantante, compositor y guitarrista escomenzó la so carrera como músicu acompañante de figures mítiques del blues como Howlin Wolf, Little Walter, Little Johnny Taylor, Jimmy Reed y Koko Taylor. En 1976 unióse a la Willie Dixon's Chicago Blues All Stars y en 1977 grabó’l so primer discu, King of the jungle, que-y abrió les puertes d’Europa, onde s’afincó nos años 80, pa volver a Chicago en 1992. Eddie C. Campbell foi cabeza de cartel na edición de 2009 del Chicago Blues Festival, l’alcuentru de blues más importante del mundu, por cuenta del so 70 aniversariu. Anguaño ta presentando en directo los temes que componen el so últimu discu hasta’l momentu, Tear this world up.

La formación cola que va actuar n’Uviéu ta formada, amás de pol propiu Campbell (guitarra y voz), por Quique Gómez (harmónica y voz), Pablo Sanpa (guitarra), Héctor Rojo (contrabaxu y baxu) y Pete Benito (batería).