Llibros

«Gijón entre líneas» viaxa na historia de la ciudá a través del tresporte colectivu

Portada del llibru.

El Conceyu de Xixón punxo estos dies na cai’l llibru tituláu Gijón etre líneas, de Javier Granda Álvarez, onde, a través del tresporte urbanu y la Empresa Municipal de Tresporte Urbanu (EMTUSA), van tratándose los fechos y socedíos más importantes de la sociedá xixonesa de los últimos dos sieglos.

Sobre les llínies del tresporte colectivu de Xixón escríbese la historia reciente de la ciudá. Munchos años pasaron dende que los populares y venerables tranvíes conectaben a los xixoneses colos sos centros d’ociu o de trabayu. Un serviciu que foi ampliando’l so radiu d’acción a midida que s’abríen rutes nueves. En manes privaes nunos años, la iniciativa del Conceyu foi decisiva pa dotar a Xixon d’un tresporte públicu y modernu.

Francisco Javier Granda Álvarez (Mieres, 1971) ye diplomáu na Escuela Universitaria de Maxisteriu y llicenciáu en Xeografía pola Universidá d’Uviéu y compaxina’l so trabayu como xeógrafu con investigaciones sobre l’urbanismu y la historia urbana de Xixón. Les sos obres más recientes son Natural de Gijón. Parques, jardines y espacios verdes municipales (2007) y El parque de Isabel la Católica, un parque para las cuatro estaciones (2007).