Llibros

El llibru «Patrimonio olvidado: hórreos y paneras en el concejo de Grau» estudia les construcciones tradicionales moscones

Les llibreríes del país tán acabante recibir el llibru Patrimonio olvidado: hórreos y paneras en el concejo de Grau, de Gustavo Adolfo Fernández Fernández (con prólogu de Xosé Antón Fernández Ambás), editáu por La Cruz de Grau.

L’horru ye ún de los símbolos más representativos d’Asturies y ún de los fenómenos d’arte popular más importantes d’Europa, lo que nun quita pa qu’haya un desconocimientu grande por parte de la propia sociedá asturiana sobre él. Esti volume quier llamar l’atención nel valor los horros y paneres del conceyu de Grau al traviés d’un averamientu a les sos caracteristiques, a la so decoración, a la documentación onde aparecen mencionaos horros moscones, etc. El llibru inclúi 300 fotografíes, delles propuestes d’actuación y un apartau específicu sore los horros de la vila, asina como un estudiu individualizáu de 70 exemplares destacaos de tol conceyu.

Gustavo Adolfo Fernández Fernández (Grau, 1971) ye llicenciáu n’Historia, especialidá Archivística y Biblioteconomía, pola Universidá de Santiago de Compostela. Dende 1998 trabaya como bibliotecariu y xestor cultural nel Conceyu de Grau. Tien collabrao con dellos medios escritos asturianos. Nel ámbitu de les bibloteques y l’animación a la llectura, participó como conferenciante en dellos congresos y tien artículos espublizaos en bien de publicaciones especializaes. Ye miembru del Círculu d’Estudos Pramaerenses, un colectivu que trabaya na recuperación y dignificación del patrimoniu y la historia de Grau.