Arte

Delles esposiciones van conmemorar el centenariu del nacimientu del pintor Aurelio Suárez

Bocetu d'Aurelio Suárez.

El Muséu de Belles Artes, la Biblioteca Xovellanos, la Sala Cornión y el Muséu Antón de Candás van exhibir la obra del pintor Aurelio Suárez (1910-2003) nos próximos doce meses por cuenta de la conmemoración del so nacimientu, que se cumple anguaño. Dende'l branu hasta'l 14 de xineru del 2011 van poder vese estes cuatro esposiciones coles sos correspondientes publicaciones y ediciones de material pa la divulgación de la obra. Con esta iniciativa, el Gobiernu d'Asturies quier facer un homenaxe a la obra d'«ún de los nomes imprescindibles del arte asturianu contemporaneu».

La intención de la Conseyería de Cultura ye enseñar nel Belles Artes los materiales aurelianos que formen parte de los fondos de la pinacoteca y amestar otros elementos, como una publicación que va salir n'ochobre, cola que se quier contestualizar meyor el trabayu d'Aurelio Suárez. Nel branu, el Muséu Antón va exhibir la colección d'oxetos tridimensionales, escultures en madera, piedres, ensamblaxes, caxes y muebles del artista, mentes que la Biblioteca Xovellanos va mostrar a partir de payares una escoyeta d'obres que tienen el llibru como soporte y la Sala Cornión va preparar una antoloxía de materiales aurelianos.

Aurelio Suárez principió la carrera pictórica dende mui nuevu, anque de mano quixo más les ciencies y llegó a cursar estudios de Medicina en Madrid. Sicasí, la pintura, una pasión heredada de so padre, foi'l marcu nel que se desenvolvió la so carrera profesional. L'artista vivió en Barcelona, Madrid y Valencia primero d'establecese definitivamente en 1940 en Xixón, onde morrió n'abril del 2003. Suárez compaxinó la so intensa y sistemática actividá pictórica con otros trabayos, como decorador de pintures y estampación de pieces nuna comercial de lloza xixonesa o caricaturista nel diariu La Prensa.