Música

El X Certame de Gaita Premiu Gaiteru Lliberdón abre’l plazu d’inscripción

L’Asociación Cultural San Roque de Lliberdón, cola collaboración del Área de Cultura de Colunga, convoca una edición nueva del Premiu Gaiteru Lliberdón, que va celebrase nesi llugar el 6 d’agostu de 2010. El concursu namás tien una modalidá, la individual de gaita asturiana, con dos categoríes: infantil (hasta los 14 años) y adultu (a partir de los 15 años), amás d’establecese un númberu máximu de 12 participantes por cada categoría. Nun ye obligatorio dir vistíu col traxe tradicional del país, pero sí va tenese en cuenta por parte del xuráu nun sentíu positivu a la hora de les calificaciones. El plazu d’inscripción acaba’l 26 de xunetu de 2010.

La inscripción tien de formalizase personalmente o unviando per corréu la solicitú a la Casa Municipal de Cultura de Colunga (Avenida de la Reconquista, númberu 23) o a la dirección electrónica cultura@colunga.es.

Tolos participantes tienen d’interpretar dos temes llibres, de los qu’hai que facer constar el títulu y l’autor, almitiéndose composiciones propies. Tolos concursantes van recibir un diploma qu’acredite la so participación nel certame. Establécense tres premios por cada categoría: el primeru na infantil consiste nuna gaita fecha artesanalmente por Vicente Prado «El Pravianu», y na d’adultu, nuna gaita del artesanu colungués Miguel Alonso Cachafeiro. Otra manera, la organización va entregar un regalu al gaiteru más mozu que participe nel actu, dientro o fuera del consursu.