Sociedá

Yá ta na rede la primer entrega del proyectu Termast de l’Academia de la Llingua

Proyectu Termast.

L’Academia de la Llingua Asturiana presentaba hai unos díes el proyectu denomináu Termast; trátase d’un centru en llinia de terminoloxía en llingua asturiana que ta llamáu a revolucionar les posibilidaes terminolóxiques del asturianu. Esta iniciativa surde en xineru de 2009 d’un trabayu conxuntu ente l’ALLA, el Colexu d’Inxenieros n’Informática y el colectivu Softastur.

L’oxetivu de Termast ye proponer elementos terminolóxicos nuevos en llingua asturiana pa facer d’ella una ferramienta afayadiza y útil na sociedá actual. A la escontra d’otros entamos y propuestes normatives de l’Academia, Termast quier que sían iniciatives individuales o grupales concretes les que dean a la conocencia pública la so particular propuesta de solución a los problemes terminolóxicos del asturianu nos estremaos contestos comunicativos: ámbitu científicu, de les tecnoloxíes nueves, económicu, sociolóxicu, humanísticu... Estes propuestes van tar al algame de los usuarios de la llingua asturiana, de mou que van ser éstos —col so usu o refugu— los que van dir dándo-yos calter de normalidá, de mou que llueu d’ello l’Academia pueda dir inxiriéndolos dientro de los sos calces normativos.

La páxina web (http://www.academiadelallingua.com/termast/) ta yá disponible cola primer propuesta, referida a Términos básicos d'Economía y Empresa, presentada por Guillermo Ovidio Villa Balbona y Fernanda Valdés Rodríguez.