Cine, teatru y TV

Llaboral entama un taller nuevu d’espresión teatral col nome «French Chicken»

Del 1 al 4 de marzu Llaboral entama un taller d’espresión artística col nome de French Chicken. Va ser de carácter gratuítu y pensáu namás que pa mozos mayores de 18 años, tien como finalidá la puesta en marcha d’una performance pa doce homes y doce pollos.

El taller amiesta conceptos pedagóxicos y creativos, y el so puntu de partida alcuéntrase nuna parte del espectáculu Chair de Poule. A partir d’ésti, el coreógrafu Toméo Vergés quier treslladalu a un espaciu non teatral convidando a participar a una docena d’homes en compañía d’una docena de pollos.

Pa esti taller nun se requier nenguna esperiencia particular, abriendo asina la posibilidá de participación a toles persones interesaes. L’únicu requisitu ye’l compromisu de los alumnos a participar na presentación final que va facese’l cuartu día: la performance French Chicken.

Esta actividá va tar impartida pol coreógrafu d’orixe catalan Tomeo Vergés, que desarrolló tola so carrera en Francia, onde reside dende los años 80. En 1992 pon en marcha Man Drake, la compañía cola que creó espectáculos de cultu onde la danza y el teatru sucédense ensin fronteres y empapaos de surreaismu, humor negru, incorreción social, anarquía voluntaria y frescura abondo.