Música

«Barriendo pa fuera» de Galán yá ta na cai

Portada del discu.

Con dalgo de retrasu sobre la fecha prevista, el primer discu de Galán, tituláu Barriendo pa fuera yá ta na cai de la mano del sellu discográficu El Subko Producciones.

El músicu de Tresona (Corvera) Galán, que se fai acompañar por una banda llamada Los Antifar, yá lleva dellos años grabando maquetes caseres, percorriendo los escenarios asturianos y collaborando con otros grupos. Presenta agora como primer discu oficial esti Barriendo pa fuera, con composiciones onde’l rap fusiónase con bien d’estilos: punk, ska, folk, bakalao…, too entra nel so estilu particular. Una música mestiza que surde de la so decepción pa con una escena hip hop más esmolecida por otres cuestiones que polos problemes sociales; xustamente éstos son la base y la inspiración de les sos lletres, mui crítiques y incisives. Collaboren con él otros músicos del panorama musical asturianu como Maxi (Fe de Ratas), Arma X, Delfo (La Tarrancha), Gabri (Dsakato) y dellos componentes de los grupos Skontra y Falanoncaduca. El discu ta grabáu nos Stylo AntiStudiox cola producción de Dani Stylo y masterizáu en Tutu Estudios por Sergio Rodríguez.

Depués d’una xira conxunta col grupu Fe de Ratas per delles ciudaes de Galicia y Castiella, Barriendo pa fuera va presentase en directo n’Asturies, probablemente, a lo llargo d’esti mes de febreru.