Música
El XIII Certame de Canción Asturiana de Samartín del Rei Aurelio llogra un ésitu de participación
07-02-2010L’Asociación Cultural Toná y Folklore de Samartín del Rei Aurelio, en collaboración col Conceyu, ta celebrando la treceava edición del Certame de Canción Asturiana, ún de los que más sonadía y prestixu tien de tolos que se celebren nel país.
La edición d’esti añu 2010 cuenta con 65 cantadores en total, provenientes de toa Asturies, lo que ye tou un llogru de participación y respuesta. Ente toos ellos van disputase les 22 distinciones, de les que 15 correspuenden a la categoría masculina y 7 a la femenina, ello ye asina porque hai más homes que muyeres nes inscripciones.
El certame va desarrollase hasta’l mes de mayu al traviés de delles fases, que tan celebrándose tolos vienres, a les 20:00 hores, nel Teatru Municipal de Samartín del Rei Aurelio, asitiáu en L’Entregu.
Como novedá, esti añu fuera de concursu va facese una muestra de baille asturianu a cargu d’una docena de pareyes, y va estudiase la posibilidá d’integrar esta prueba de baille a concursu nes próximes ediciones.
