Arte

El Revillaxixéu espón «La Rosa Vera catalana» de Jaume Pla

Palaciu Revillaxixéu.

El Centru Cultural Cajastur Palaciu Revillaxixéu de Xixón inauguraba esta selmana la esposición La Rosa Vera catalana, una muestra d’estampes del artista Jaume Pla, onde se reivindica la identidá catalana y la vuelta al Noucentisme frente a les nueves vanguardies na posguerra. Asina lo esplicó nel Revillaxixéu’l comisariu de la muestra, Javier Gómez.

Gómez definió a Pla como un autodidacta tanto nel grabáu como na escritura, que se propunxo formar a otros artistes catalanes pa reactivar unes técniques en desusu y crear un mercáu nuevu. D’esta manera, invirtió la costume y unvió a cada escritor una estampa pa que la comentara. Foron cerca de 40 los que lo fixeron, como se va poder comprobar na esposición, abierta hasta’l 4 d’abril.