Música

El Premiu al Meyor Cantar en Llingua Asturiana yá tien finalistes

La Directora Xeneral de Política Llingüística, Consuelo Vega, daba a conocer ayeri vienres los nomes de los cinco finalistes del Premiu al Meyor Cantar en Llingua Asturiana 2010. Los artistes que van competir por esti gallardon, na convocatoria d’esti añu, van ser Brandal (col tema «Chueve»), Dixebra (con «Cantar de la redención»), Xera (con «Tierra»), Misiva (con «La casa’l mieu») y Lafu&Rebeca (con «El mio sitiu»).

Tamién s’anunció que la gala d’entrega va facese nel Auditoriu Teodoro Cuesta de la Casa de la Cultura de Mieres, concretamente’l sábadu 20 de febreru. Ellí van tar los cinco finalistes pa interpretar en directo’l tema seleccionáu, y conocer depués el nome del ganador. Como ramu al actu’l ganador del añu pasáu, el cantautor Alfredo González, va ufiertar un conciertu.

Los cinco finalistes d’esta edición representen estilos perdistintos dientro del panorama musical asturianu actual: del rock mestizu de Dixebra al punk-rock de Misiva, del folk-rock de Brandal al electro-folk de Xera, ensin escaeer la canción d’autor de Lafu&Rebeca. Ente toos ellos ufierten una visión xeneral de la música fecha n’asturianu anguaño, con nomes mui conocíos d’ella y otros muncho más nuevos.

El Premiu al Meyor Cantar en Llingua Asturiana instituyóse nel añu 2007 pola Conseyería de Cultura y Turismu col oxetivu de promocionar y favorecer la creación musical orixinal nesi idioma. La convocatoria ta abierta a toos aquellos grupos y solistes que nel añu anterior editaren dalguna canción n’asturianu (o en gallego-asturianu), sía del estilu que sía, cola única condición de que tanto la música como la lletra tienen que ser orixinales dafechu. Los ganadores de les ediciones anteriores foron: «Azul y gris» (Toli Morilla), «Nosh» (Herbamora) y «La nada y tu» (Alredo González).